Беларусу Тоҷикистон истеҳсоли тракторҳоро барои содирот ба кишварҳои ҳамсоя ба роҳ мемонанд
![](https://khovar.tj/wp-content/uploads/2016/03/Posol-Belarusii.jpg)
Душанбе, 12.03.2016 (АМИТ «Ховар).- «Робитаҳои моро бо Тоҷикистон на танҳо муносибатҳои шарикӣ ва эътимоду бовар, балки дӯстӣ низ мепайвандад. Мутмаинам, ки дар оянда низ муносиботи дуҷонибаи мо босуръат рушд мекунанд. Ҳамчун сафири Беларус дар Тоҷикистон талоши зиёд хоҳам кард, то ки ин робитаҳои эътимоду боварро шаҳрвандони одии кишварҳои мо низ эҳсос кунанд»,-иброз дошт пас аз супоридани эътимоднома ба Президенти Ҷумҳурии Тоҷикистон Эмомалӣ Раҳмон сафири тозатаъйини Ҷумҳурии Беларус дар Тоҷикистон Олег Иванов.
Олег Иванов иттилоъ дод, ки моҳҳои наздик ҷаласаи 10-уми ҷашнии комиссияи муштараки байниҳукуматӣ доир мегардад ва дар назар аст, ки ҳайати бонуфузи вазоратҳо аз Минск ба Душанбе ташриф оранд. Яке аз масъалаҳои асосии рӯзномаи ҷаласа-ин ба итмом расонидани ташкили истеҳсолоти васлкунӣ дар Тоҷикистон мебошад.
«Мо на танҳо мехоҳем, ки тракторҳоямонро фурӯшем, балки мехоҳем, ки Тоҷикистон онро худ истеҳсол кунад. Мо дар нақша дорем, ки соли равон сохтмони истеҳсолоти васлкуниро дар шаҳри Ҳисор хотима бахшем. Мувофиқаи чунин як лоиҳа дар вилояти Хатлон низ ба итмом расида истодааст ва мо мехоҳем, ки дар он ҷо тракторҳоро на танҳо барои эҳтиёҷоти Тоҷикистон, балки барои кишварҳои ҳамсоя ҳам истеҳсол кунем»,- тазаккур дод сафири Беларус дар Тоҷикистон.