Бори нахуст дар сохтори тандурустии пойтахт ҷарроҳии дилу рагҳои кӯдакон роҳандозӣ мешавад

Душанбе, 04.03.2016. (АМИТ «Ховар»). – Бори нахуст дар сохтори тандурустии пойтахт роҳандозӣ намудани фаъолият дар самти ҷарроҳии дилу рагҳои кӯдакон, сохтори алоҳидаи покнамоии хуни (гемодеалези) кӯдакон, шуъбаи муҳандисии клиникӣ, тибби суннатӣ ва 50 кати наҷоти бахшҳои гуногун фароҳам шуд. Чунин имконот дар маҷмаи нави тандурустии «Истиқлол» -и пойтахт роҳандозӣ шудааст.

Бо таъмини чунин шароити муосир акнун мардум ба хориҷи кишвар нарафта, дар маҳалли зисти худ бо харҷи камтарин маблағ ва сарфаи вақт табобат мегиранд.

Зимни шиносоӣ ва суҳбат бо кормандони маҷмааи тандурустии «Истиқлол»  Президенти мамлакат Эмомалӣ Раҳмон бори дигар мутахассисонро ба кори пуршарафи табибӣ, истифодаи мақсадноки техникаю таҷҳизоти муосири соҳа, хизмати содиқона ба нафъи давлату миллат ва мардуми шарафманди тоҷик ҳидоят намуд.