Дар Ҳолланд гумонбар дар омода намудани ҳамлаи террористӣ дар Фаронса дастгир гардид

Душанбе, 28.03.2016 (АМИТ «Ховар»).-Полиси Ҳолланд дар Роттердам марди 32-соларо бо гумони омода намудани ҳамлаи террористӣ дар Фаронса дастгир намуд. Дар ин бора Reuters хабар медиҳад.
Гуфта мешавад, ки гумонбар бо дархости ҳукумати Фаронса дастгир шудааст ва ба наздикӣ ӯ бояд ба кишвар супорида шавад. Шахсияти дастгиршуда ошкор карда намешавад.
Ба иттилои манбаъ, полиси Ҳолланд зимни амалиёти махсус инчунин 3 марди дигарро низ дастгир кард. Сокинони хонаҳои наздик ба ҷойҳои бехавф таҳвил дода шуданд. Котиби матбуотӣ Вим де Бруин аз шарҳ додани ин қазия худдорӣ карда, эълон дошт, ки ин парвандаро прокуратураи Фаронса тафтиш мекунад.
Бояд гуфт, ки дар давоми чанд моҳи охир дар Аврупо силсилаи ҳамлаҳои террористӣ рух дод. Аз ҷумла, шаби 14-уми ноябр ҷангиён дар варзишгоҳи «Стад де Франс» таркишҳо содир карда, дар толори консертии «Батаклан» мардумро асир гирифтанд, инчунин ба қаҳвахона ва тарабхона ҳамла оварданд, ки дар натиҷа 130 нафар ба ҳалокат расид.
Рӯзи сешанбеи гузашта, 22-уми март дар фурудгоҳи Брюссел якбора ду таркиш ба қайд гирифта шуд. Баъдан таркиши сеюм дар маркази шаҳр- дар истгоҳи метрои «Маэлбек» ба амал омад. Дар натиҷаи ин таркишҳо 28 нафар ба ҳалокат расида, 340 каси дигар осеб диданд.