Ҳилоли Аҳмар ба дарёфт ва мусоидат ба пешгирии бемории сил байни муҳоҷирони меҳнатӣ мусоидат хоҳад кард

Душанбе, 10.03.2016 (АМИТ «Ховар»). -Муовини вазири меҳнат, муҳоҷират ва шуғли аҳолии Ҷумҳурии Тоҷикистон Маҳмадуллозода Нурулло Раҳматулло 9 март бо Котиби генералии Ҷамъияти Ҳилоли Аҳмари Тоҷикистон Қурбониён Баҳодур Бобоҷон мулоқот анҷом дод.
Мақсад аз баргузории мулоқот ба роҳ мондани ҳамкорӣ дар доираи Созишномаи байни Вазорати меҳнат, муҳоҷират ва шуғли аҳолии Ҷумҳурии Тоҷикистон ва Ҷамъияти Ҳилоли Аҳмари Тоҷикистон мебошад.
Бояд зикр намуд, ки яке аз самтҳои асосии фаъолияти ин созмон масъалаҳои вобаста ба дарёфт ва мусоидат ба пешгирии бемории сил ва дигар бемориҳои сирояткунанда дар миёни муҳоҷирони меҳнатӣ мебошад.
Зимни мулоқот тарафҳо ба мувофиқа омаданд, ки барои татбиқи созишномаи мазкур бобати пешгирии касалиҳои сирояткунанда нақшаи корӣ таҳия намоянд, ки ин барои бурдани корҳои иттилоотию фаҳмондадиҳӣ дар миёни муҳоҷирони меҳнатӣ шароити мусоид фароҳам меоварад.
Вохўрӣ дар фазои дўстона ва ҳусни тафоҳум баргузор гардида, ҷонибҳо омодагии хешро барои ҳамкории минбаъда баён намуданд.