Мусодираи беш аз 9 кг маводи мухаддир дар пойтахт

Душанбе, 31.03.2016.(АМИТ «Ховар»).- Хадамоти гумруки кишвар аз мусодираи беш аз 9 килограмм маводи мухаддир иттилоъ медиҳад. Гуфта мешавад, ки зимни амалиёти фаврӣ кормандони Раёсати ташкили мубориза бар зидди ҳуқуқвайронкуниҳои гумрукии Хадамоти гумруки назди ҳукумати ҷумҳурӣ дар ҳудуди пойтахт шаҳрванд М. У-ро бо гумони даст доштан дар муомилоти ғайриқонунии маводи мухаддир дастгир намуданд.
Ҳангоми кофтукови воситаи нақлиёти тамғаи Мерседес Бенс, аз бағоҷи мошини мазкур як қуттии картонӣ дарёфт гардид, ки дар дохили он 20 бастаи селофанпечи рангашон сиёҳ бо вазни беш аз 9 килограмм маводи нашъаовар ошкор ва мусодира шуд. Назар ба маълумотномаи коршиносони шуъбаи ташхиси судӣ вазни холиси маводе, ки аз шаҳрванди Ҷумҳурии Тоҷикистон М.У мусодира гардидааст, 9 килограмму 086, 6 граммро ташкил дода, маводи нашъаовари навъи ҳашиш аст.
Ҳамин тариқ, шаҳрванд М. У бо ҳаракатҳои худ ҷинояти дар моддаи 200, қисми 4 Кодекси ҷиноятии Ҷумҳурии Тоҷикистон пешбинишударо содир намудааст, ки он ҷавобгарии ҷиноятиро барои ғайриқонунӣ соҳиб шудан, нигоҳ доштан, интиқол ё фиристодан, мақсади ба соҳибияти каси дигар додани воситаҳои нашъадор ба миқдори махсусан калон содир намудааст. Дар асоси ин далелҳо нисбат ба шаҳрванд М. У. парвандаи ҷиноятӣ боз гардида, барои тафтиш ба Прокуратураи генералии ҷумҳурӣ фиристода шуд.