«Наврӯзи шеър» дар ДДЗТ

Душанбе, 17.03.2016. (АМИТ «Ховар»).- 16 марти соли равон бо ташаббуси факултаи филологияи тоҷики ДДЗТ ба номи С.Улуғзода дар доираи Ҳамоиши ҳавзаи адибони Наврӯз маҳфиле бо номи «Наврӯзи шеър» доир гардид. Дар маҳфил шоираи ширинкалом Адибаи Хуҷандӣ ширкат варзида, аз ашъораш шеърҳо қироат намуд. Ҳамзамон ба навқаламони донишкада, ки дар роҳи шеърнависӣ қалам ба даст гирифтаанд, маслиҳатҳои муфид дод.
Навқаламони донишкада Каримҷон Салимов, Кишваршо Ниёзӣ, Доро Суҳробӣ, Меҳрангези Зиёвиддин, Бегиҷон Аскаров, Ёрмуҳаммад Шоев ва дигарон порчаҳои шеърии худро, ки дар ин фасли зебои сол ва дар ин фурсати муносиб барояшон муҳайё гардида буд, қироат намуданд.
Маҳфил дар доираи худшиносии миллӣ, арҷгузорӣ ба арзишҳои миллӣ, эҳтироми муқаддасоти Ватан, ҳифз ва арҷгузории ин марзу буми аҷдодӣ доир гардид.