Ҷоми ҷаҳон- 2018. Мубориза дар Осиё шиддат мегирад

Душанбе, 31.03.2016 (АМИТ «Ховар»).- Баъди ба анҷом расидани дидорҳои марҳалаи дуввуми мусобиқа барои Ҷоми ҷаҳон- 2018 оид ба футбол дар қиъаи Осиё, ки финали он дар Русия баргузор мешавад, 12 дастаи муваффақ муайян гардиданд. Ба ҳамин тартиб аз мақоми аввали гурӯҳҳо тимҳои мунтахаби Арабистони Саудӣ, Австралия, Қатар, Эрон, Ҷопон, Таиланд, Кореяи ҷанубӣ ва Ӯзбекистон, аз ҷои дуввум миллипӯшони Ироқ, Сурия, Амороти Мутаҳидаи Араб ва Чин барои 4-5 ҷойи муайяншуда муборизаро идома медиҳанд.
Марҳалаи сеюми бозиҳо баъди қуръакашӣ, ки рӯзи 12 апрел дар мақомгоҳи КФО- шаҳри Куала Лумпури Малайзия барпо мегардад, шурӯъ хоҳад шуд.
Тибқи низомномаи мусобиқот 12 даста ба ду гурӯҳ ҷудо мешаванд ва вохӯриҳо ба таври даврӣ сурат гирифта, ҳар як тим бо баргузор кардани бозиҳои рафту баргашт онро сомон медиҳад.
Ду дастаи ғолиб ва ҷои дуввуми гурӯҳҳо мустақиман ба бозиҳои Ҷоми ҷаҳон мераванд. Барандагони мақоми сеюм бо ҳам дар ду рақобат ғолибро муайян карда, барои роҳхат ба Ҷоми ҷаҳон бо соҳиби мақоми панҷуми КОНКАКАФ дар ду бозӣ мусобиқа меороянд.
Ба ҳамин тартиб дар ҷамъбаст мо иштирокдорони Ҷоми ҷаҳон- 2018- ро дар Осиё хоҳем дид.