Путин ва Тсипрас аҳамияти оташбас дар Сурияро баррасӣ карданд
Душанбе, 11.03.2016. (АМИТ «Ховар»). — Зимни суҳбати телефонии президенти Русия Владимир Путин ва сарвазири Юнон Алексис Тсипрас як зумра масъалаҳо, аз ҷумла буҳрони Сурия баррасӣ гардиданд. Дар ин бора хадамоти матбуоти президенти Федератсияи Русия хабар медиҳад.
«Ҳангоми баррасии масъалаҳои байналмилалӣ диққати махсус ба буҳрони Сурия бо назардошти зарурати риояи низоми оташбас дар ин кишвар зоҳир карда шуд», — иттилоъ медиҳад манбаъ.
Бино ба хабари хадамоти матбуоти президенти Русия, доир ба ин масъала В. Путин оташбасро омили асосии баэътидоловарии вазъ дар минтақа хонд. Оташбас барои беҳтаргардонии вазъи башардӯстона дар ҳудуди Сурия ва ҳалли муваффақонаи сиёсии низои ин кишвар зарур мебошад.
Тсипрас низ доир ба масъалаи буҳрони Сурия ибрози андеша кард. «Дар навбати худ, сарвазири Юнон ба иқдомҳои пешгирифта баҳои баланд дода, оид ба чораҳои андешидаи Иттиҳоди Аврупо вобаста ба раванди ҳалли мушкилоти гурезагон маълумот дод», — хабар медиҳад манбаъ.