Ш. Комилзода: Тағйиру илова ба Конститутсия- зарурати воқеӣ ва таърихии даврони нави давлатдорӣ

Душанбе, 04.03.2016 (АМИТ «Ховар»).- «Рушди ҷомеаи нав тақозо намуд, ки дар низоми қонунгузории Ҷумҳурии Тоҷикистон низ тағйироту иловаҳо ворид шаванд. Аз ин рӯ аз ҷониби Парлумони кишвар пешниҳод шудани як зумра тағйиру иловаҳо ба Конститутсияи (Сарқонуни)  Ҷумҳурии Тоҷикистон саривақтӣ мебошанд, зеро  дар тӯли 25 соли соҳибистиқлолии Тоҷикистон, дар тамоми соҳаҳои мухталифи ҳаёти ҷомеа таҳаввулоти нав ба вуқуъ пайвастанд.  Он таҳаввулоту пешравиҳое, ки дар ҳаёти сиёсӣ, иқтисодӣ ва илму фарҳанги Тоҷикистон ба вуқуъ пайвастанд, тақозо намуданд, ки дар сохтори Конститутсияи (Сарқонуни) Ҷумҳурии Тоҷикистон низ  тағйиру иловаҳо ворид карда шаванд»,- гуфт Шариф Комилзода, директори Пажӯҳишгоҳи илмӣ- тадқиқотии фарҳанг ва иттилооти Вазорати фарҳанги Ҷумҳурии Тоҷикистон имрӯз зимни баргузории мизи гирд.

Ҳамчунин ба андешаи номбурда тағйиру иловаҳо ба Конститутсияи (Сарқонун)-и Ҷумҳурии Тоҷикистон зарурати воқеӣ ва таърихии даврони нави давлатдории Тоҷикистон маҳсуб шуда, барои рушди бештари Тоҷикистон тамоми шароитро муҳайё месозад.