Таҷлили Наврӯз дар кӯдакистони президентӣ

Хуҷанд, 25.03.2015.(АМИТ «Ховар»).-Дар доираи тантанаҳои Наврӯзи ҷаҳонӣ дар кӯдакистони президентӣ, воқеъ дар шаҳри Хуҷанд иди Наврӯз бошукӯҳ таҷлил гардид.
Дар чорабинии идона, ки дар он толибилмону волидайни тарбиятгирандагони муассиса, меҳмонон аз Вазорати маориф ва илми ҷумҳурӣ, идораҳои маорифи шаҳру вилоят ва сохторҳои мухталиф иштирок доштанд, Лутфия Имматова, сармутахассиси раёсати таҳсилоти томактабии Вазорати маориф ва илми Ҷумҳурии Тоҷикистон низ иштирок намуда, ҳозиринро бо иди Наврӯз табрик намуд.
Тавре ки ба АМИТ Ховар Ҷаҳонгир Салимов, директори кӯдакистони президентӣ иттилоъ дод, бахши фарҳангии чорабинии идона дар иҷрои тарбиятгирандагони гурӯҳҳои хурду калони муассисаи мазкур пешкаши ҳозирин гардид. Салому паёми тарбиятгирандагон бо се забон — точикӣ, русӣ ва англисӣ садо дода, кӯдакон дар васфи Ватан, Модар, Баҳор, Наврӯз ва бойчечак шеъру суруд хонданд.
Ёдовар мешавем, ки Кӯдакистони президентӣ моҳи сентябри соли 2013 бо иштироки Сарвари давлат мавриди истифода қарор гирифта, он имкони фарогирии беш 1000 нафарро доро мебошад.