Тамоми кӯшишҳо барои таҳкиму инкишофи минбаъдаи ҳамкории Того ва Тоҷикистон ба харҷ дода мешавад

Душанбе, 12.03.2016. (АМИТ «Ховар»). -«Ба хотири қонеъ гардонидани умедвориҳои Президенти кишвари Того, ки ба ман ҳамчун Сафири фавқулода ва мухтори Ҷумҳурии Того вогузор кардааст, бо шурӯи фаъолияти худ дар ин мақом тамоми кӯшишҳоро барои дарёфти роҳу василаҳои таҳкиму инкишофи минбаъдаи ҳамкории байни ҳарду кишвар ба харҷ хоҳам дод, то барои татбиқи амалии лоиҳаҳои соҳаҳои мухталиф, аз ҷумла фарҳанг, маориф, табодули таҷриба ва сайёҳӣ дар ҳарду кишвар иқдоми муштарак анҷом диҳанд»,-чунин иброз намуд сафири аввалини фавқулода ва мухтори Ҷумҳурии Того Оуро Сама Муҳаммад Сад баъди супоридани эътимоднома ба Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар назди хабарнигорон.
Сафири тозаинтихоб изҳори бовар кард, ки робитаҳои дӯстии байни ҳарду кишвар дар оянда тақвияти бештар пайдо хоҳанд кард. Оуро Сама Муҳаммад Сад паёми роҳбари кишвари Тогоро ба Президенти Ҷумҳурии Тоҷикистон муҳтарам Эмомалӣ Раҳмон бо таъкиди нақши созгори роҳбари кишвар дар арсаи байналмилалӣ, алалхусус дар мавзӯи таъмини сулҳ, амният ва рушди иҷтимоию иқтисодӣ расонид.