«Журналистикаи мултимедиявӣ»- дастур доир ба журналистикаи чандрасонаӣ

Душанбе, 25.03.2016 (АМИТ «Ховар»).- Дар арафаи Наврӯз китоби нави профессори кафедраи журналистикаи байналхалқии Донишгоҳи миллии Тоҷикистон Ҷовид Муқим «Журналистикаи мултимедиявӣ» дар нашриёти «Озар» аз чоп баромад. Дар дастури мазкур бахшҳои гуногуни журналистикаи чандрасонаӣ, аз қабили аксбардорӣ ва истифодаи он барои сомона, сабт ва таҳрири садо, слайд-шоуи садонок, видео дар формати Интернет, усулҳои графикии пешниҳоди иттилоъ дар Интернет, блогҳо ва сомонаҳо баррасӣ гардидааст. Аз дастур метавон асосҳои журналистикаи мултимедиявиро омӯхта, малакаи аввалияи тахассусӣ пайдо кард. Ҳамчунин дар дастур оид ба одоби нигорандагӣ ва муошират дар расонаҳои интернетӣ маълумот дода шудааст.
Китоби мазкур дар Тоҷикистон аввалин дастури таълимӣ дар ин соҳа буда, барои донишҷӯёни факултаву шуъбаҳои журналистика ва онҳое, ки мехоҳанд аз журналистикаи чандрасонаӣ огоҳ шаванд, пешбинӣ шудааст.