Баррасии масъалаи сохтмони заводи чархҳои резинӣ

Душанбе, 28.04.2016. /АМИТ «Ховар»/. Масъалаи  густариши ҳамкории дуҷониба дар соҳаи саноат ва технологияҳои нав оид ба ворид намудани сармояи иловагӣ ба Ҷамъияти муштараки «Апрелевка» ва сохтмони заводи чархҳои резинӣ зимни мулоқоти вазири саноат ва технологияҳои нави Ҷумҳурии Тоҷикистон Шавкат Бобозода бо ҳайати намояндагони ширкатҳои Юан Чен ва Дэ Жуй Бао-и Ҷумҳурии Мардумии Чин  баррасӣ гардид.
Бино ба иттилои хадамоти матбуотии вазорат, ҷонибҳо инчунин ба паҳлуҳои дигари ҳамкорӣ таваҷҷуҳ зоҳир намуда, аз натиҷаи вохӯрӣ изҳори қаноатмандӣ намуданд.
Иброз гардид, ки ҳамкории дуҷониба дар бахшҳои гуногун мавриди омӯзиши тарафҳо қарор хоҳад гирифт.