Баррасии раванди омодагиҳо ба баргузории маросими расмии оғози сохтмони тарҳи КАСА — 1000 дар ВКХ

Душанбе, 20.04.2016 /АМИТ «Ховар»/. 19 апрели соли 2016 муовини якуми вазири корҳои хориҷии Ҷумҳурии Тоҷикистон Низомиддин Зоҳидӣ ҳайати Ҷумҳурии Исломии Афғонистон бо роҳбарии муовини вазири умури хориҷаи ин кишвар доктор Насираҳмад Андешаро, ки бо сафари корӣ дар Душанбе қарор дорад, ба ҳузур пазируфт.
Дар ҷараёни суҳбат, ки дар фазои дӯстона ва ҳамдигарфаҳмии комил сурат гирифт, ҷонибҳо ҳолат ва дурнамои ҳамкории Тоҷикистон ва Афғонистонро дар заминаҳои сиёсӣ, иқтисодӣ, энергетикӣ ва иҷтимоӣ баррасӣ намуданд. Дар ин замина ба раванди омодагиҳо ба баргузории маросими расмии оғози сохтмони тарҳи КАСА -1000, ки татбиқи он дар рушди ҳамкории гуногунҷанба ва таъмини амнияту суботи минтақа аҳамияти бузурги таърихӣ дорад, таваҷҷуҳи вежа зоҳир гардид.
Атрофи тарҳҳои дигари минтақавӣ ва масъалаҳои тақвияти ҳамкорӣ дар соҳаҳои амният, ҳифзи сарҳадот ва муборизаи муштарак бар зидди терроризми байналмилалӣ ва қочоқи маводи мухаддир табодули назар сурат гирифт.