Бунёди боғи интенсивӣ бахшида ба ҷашни Ваҳдати миллӣ

Файзобод, 20.04.2016/АМИТ«Ховар»/. Дар ҷамоати деҳоти Қалъаи дашти ноҳияи Файзобод ба истиқболи ҷашнҳои Ваҳдати миллӣ ва 25-солагии Истиқлолияти давлатии Ҷумҳурии Точикистон корҳои ободонӣ, сабзазоркунӣ ва ниҳолшинонӣ ҷараёни тоза касб намудаанд. Сокинони ҷамоати мазкур дар рӯзҳои истироҳат ба ҳашар баромада, дар корҳои тозакорӣ саҳм мегузоранд.
Хоҷагиҳои инфиродии ҳудуди ҷамоат аз ҳисоби картошкаи тухмии аълосифати захиравӣ дар майдони 137 гектар картошка кишт намуда ва 90 гектар боғи нав бунёд кардаанд.
Инчунин соҳибкор Низомиддин Раҷабов бо маблағи зиёда аз 200 ҳазор сомонӣ як гектар боғи замонавии «интенсивӣ» бунёд кардааст, ки тибқи иттилои мутахассисон дар як гектари чунин боғҳо 2500 бех ниҳол шинонида, дар муддати 5 сол то 80 тонна ҳосил гирифтан мумкин аст.