Дар Данғара Қасри фарҳанг бунёд гардид

Душанбе, 20.04.2016 /АМИТ«Ховар»/. Дирексияи сохтмони ҳукуматии назди Дастгоҳи иҷроияи Президенти Ҷумҳурии Тоҷикистон дар ноҳияи Данғара Қасри фарҳанг бунёд намуд, ки барои 700 ҷойи нишаст пешбинӣ гардидааст. Дар ин бора Шариф Эмомов, мудири бахши фарҳанги мақомоти иҷроияи ҳокимияти давлатии ноҳия иттилоъ дода, зикр намуд, ки бинои Қасри фарҳанг дар рӯзи таҷлили ҷашни сарнавиштсози миллат — 25-солагии Истиқлолияти давлатии Ҷумҳурии Тоҷикистон мавриди истифода қарор мегирад.
— Маҳз бо шарофати Истиқлолияти давлатӣ дар ноҳия шумораи муассисаҳои фарҳангӣ сол то сол меафзояд, аз ҷумла то имрӯз 13 муассисаи толорӣ, 28 китобхонаи оммавию бачагона, 2 мактаби санъати бачагона ва ансамбли тарона ва рақси «Садбарг» ба мардум хизмат мерасонанд ва ба маблағи зиёда аз 300 ҳазор сомонӣ биноҳои Қасри фарҳанг дар деҳаҳои Гулистон, Хоҷа Шақиқи Балхӣ ва Пушинг таъмир гардида, мавриди истифодаи ҳунармандон қарор дода шуданд, — афзуд Ш. Эмомов.