Дар Тоҷикистон терминали нави байналмилалӣ ба истифода дода мешавад

Душанбе, 05.04.2016 /АМИТ Ховар/. Ояндаи наздик дар ғарби Тоҷикистон терминали наздисарҳадии байналмилалии автомобилӣ дар масоҳати 5 гектар мавриди истифода қарор дода мешавад.
Терминал дар назди дидбонгоҳи гумрукии «Дӯстӣ»- и Раёсати минтақавии гумрукии Турсунзода бунёд гардида, корҳои сохтмонӣ алҳол дар марҳилаи анҷомёбист.
Терминал яке аз иншоотҳои ҷашнӣ маҳсуб ёфта, бо дастгирии Ҳукумати Ҷумҳурии Тоҷикистон бунёд мегардад ва ҷавобгӯи меъёрҳои байналмилалӣ мебошад. Терминали нав ба соҳибкорон шароити мусоид фароҳам меоварад, то ба расмиятдарории гумрукии молу воситаҳои нақлиётро дар муддати кӯтоҳ ва бидуни хароҷоти зиёдатӣ дар як ҷо анҷом диҳанд. Терминали байналмилалии наздисарҳадии автомобилӣ аз якчанд бино, аз қабили бинои дуошёнаи маъмурӣ барои гумрукчиён, ошхона, меҳмонхона, хобгоҳ барои ронандагон дорои 200 ҷойи хоб, анбори нигоҳдории маҳсулот, сардхона, нуқтаи таъмири мошинҳо, таваққуфгоҳ, нуқтаҳои тиббӣ, мубодилаи асъор, воситаҳои нақлиёти боркаш ва сабукрав, тарозуи рақамӣ, ҳавзи оташнишонӣ, қаҳвахона, ҳавзи шиноварӣ ва истгоҳи обтаъминкунӣ иборат аст.
Аз дафтари мутбуоти Хадамоти гумруки кишвар ба АМИТ Ховар иттилоъ доданд, ки корҳои сохтмонӣ дар терминали наздисарҳадии байналмилалии автомобилӣ ду сол қабл, аниқтараш моҳи майи соли 2014 оғоз гардида буданд.
Дар назар аст, ки дар терминал кормандони идораҳои соҳавӣ, ба мисли «Хадамоти назорати давлатии фитосанитарӣ ва карантини растанӣ, «Тоҷикстандарт», Бозрасии давлатии автомобилӣ, Хадамоти назорати давлатии бойторӣ, Хадамоти гумрук ва Вазорати нақлиёт бо кор таъмин карда шаванд.