«Донишномаи фарҳанги мардуми тоҷик»- муаррифгари арзишҳои маънавии халқи тоҷик

Душанбе, 28.04.2016./АМИТ«Ховар»/. Дирӯз дар Китобхонаи миллии Тоҷикистон рӯнамоии ҷилди аввали китоби тозанашри «Донишномаи фарҳанги мардуми тоҷик» бо иштироки  зиёда аз 60 нафар донишмандону  муҳаққиқон ва фарҳангшиносон баргузор гардид.
Ҷилди аввали «Донишномаи фарҳанги мардуми тоҷик» бо  талоши Сарредаксияи илмии «Энсиклопедияи мардуми тоҷик» нашр шуда, китоби мазкур   барои муаррифии арзишҳои маънавии халқи тоҷик  нақши муҳим дорад. Ин китоби бисёрҷилда доир ба анъанаҳо, урфу одат, маросимҳо ва дигар суннатҳои миллии мардуми тоҷик маълумот дода, хонандаро бо таърихи ташаккули фарҳанги  миллиамон шинос менамояд.
Гурўҳи корӣ тасмим гирифтааст, ки дар ҷилдҳои баъдӣ дар мавзўъҳои алоҳидаи фарҳанги ғайримоддии мардумӣ, аз ҷумла «Наврўз», «Сўзанӣ», «Бофандагӣ», «Косибӣ», «Либосҳои мардумӣ», «Бозиҳои бачагона», «Ҷашнҳои иҷтимоии мардумӣ»  барои хонандагон маълумот пешниҳод намояд.