Ду медали биринҷӣ аз Филиппин

Душанбе, 29.04.2016 /АМИТ «Ховар»/.  Дар мусобиқаи интихобии   Осиё оид ба таэквондо WTF барои пайдо кардани роҳхат ба Бозиҳои олимпии Рио, ки дар пойтахти Филиппин- шаҳри Манила ба анҷом расид, ду нафар варзишгарони мамлакат ба гирифтани медалҳои  биринҷӣ муваффақ шуданд.
Дар ин вохӯриҳо дар қатори 100 варзишгар аз 36 кишвари Осиё чаҳор варзишгар  Фарҳод Неъматов (-80 кг), Алишер Гулов (+80 кг), Моҳрӯ Ҳалимова (+67 кг) ва Фарзона Раҷабова (+49 кг)  аз Тоҷикистон ширкат доштанд.
Моҳрӯ Ҳалимова дар сабқати занон дар вазни беш аз 67 кило ба медали биринҷӣ  сарфароз  гашт. Дар ин вазн Сом Сивмей аз Таиланд барандаи медали тилло дониста шуд ва бо соҳиби ҷои дуввум Кирсти Алора аз Филиппин ба Бозиҳои олимпии Рио де Жанейро меравад.
Медали дувуми Тоҷикистонро Алишер Гулов ба даст овард. Дар ин вазн Киао Сен аз Чин ва Руслан Ҷапаров аз Қазоқистон роҳхати Бозиҳои олимпиро соҳиб шуданд.
Ба ҳамин тартиб, дар мусобиқоти интихобӣ дар Филиппин танҳо мардону заноне, ки ҷойҳои 1-2-юмро комёб шуданд, соҳибони роҳхатҳои олимпӣ гардиданд. Таэквондочиёни тоҷик  дар ин намуд аз охирин имконияти худ истифода карда натавонистанд ва аз роҳхатҳо ба Олимпиадаи Рио-2016 маҳрум шуданд.