Гулистон: Қариб 20 ҳазор нафар дар раъйпурсии умумихалқӣ иштирок мекунанд

Гулистон, 26.04.2016. /АМИТ “Ховар”/. Имрӯзҳо дар ҳамаи шаҳру ноҳияҳои кишвар барои дар сатҳи баланд баргузор намудани маъракаи муҳими сиёсӣ – раъйпурсии умумихалқӣ оид ба таъғиру иловаҳо ба Конститсияи кишвар омодагиҳо ҷараён доранд. Дар ин радиф дар шаҳри барқчиёни шимоли кишвар — Гулистон низ дар самти баргузории ин чорабинӣ корҳои омодагӣ бомаром идома доранд.
Тавре  масъули хадамоти матбуотии мақомоти иҷроияи ҳокимияти давлатии шаҳри Гулистон Рустами Одизода ба хабарнигори АМИТ “Ховар”  хабар дод, барои баргузории ин чорабинии муҳими давлатӣ дар бинои шуъбаи Агентии суғуртаи иҷтимоӣ ва нафақаи маркази шаҳр ҳавзаи раъйпурсии Гулистон №29 ташкил карда шуда,  тамоми ҳуҷҷатҳои зарурӣ таҳия, участкаҳои раъйпурсӣ муайян, рўйхати шаҳрвандоне, ки дар раъйпурсӣ иштирок мекунанд, тартиб дода шуда, аъзои комиссияи участкавии раъйпурсӣ таъйин гардиданд ва ҷараёни корҳои тарғиботӣ хуб ба роҳ монда шудааст.
Ба иттилои манбаъ, барои гузаронидани раъйпурсии умумихалқӣ дар шаҳр 20 участкаи раъйпурсӣ ташкил карда шуда, тибқи рӯйхат  теъдоди умумии иштирокдорон дар раъйпурсӣ  19 ҳазору 277 нафарро ташкил медиҳад, ки аз онҳо 329 нафар бори аввал иштирок мекунанд.