Имрӯз «Реал» бо «Волфсбург» вомехӯрад

Душанбе, 12.04.2016 /АМИТ «Ховар»/. Шаби 12-уми апрел соати 11-45 бозии ҷавобии ¼ -ниҳоии Лигаи футболи Ҷоми чемпионҳои Аврупо дар варзишгоҳи «Сантияго Бернобеа» байни дастаҳои «Реал»-и Мадрид ва «Волфсбург»-и Германия баргузор мегардад. Ёдовар мешавем, ки дастаи «Реал»-и Мадрид дар бозии аввали ¼ -ниҳоии Ҷоми чемпионҳои Аврупо дар варзишгоҳи «Волфсбург Арена» дар муқобили клуби «Волфсбург» бозии хуб нишон дода натавонист ва бо натиҷаи 2:0 мағлуб шуд.
Баъди баргузории қуръакашии бозиҳои ¼- ниҳоӣ воситаҳои ахбори оммаи ҷаҳон аз он ҳадс мезаданд, ки барои ба даври дигар гузаштани «Реал» ҳарифи на он қадар пурқувват интихоб шуд ва бозиҳо барои ин дастаи шоҳона, мисли як сайругаште хоҳанд буд, аммо тавре натиҷаи бозии аввал нишон медиҳад, дастаи «Волфсбург» аз қабили он дастаҳое нест, ки бар ҳарифи овозадораш осон тан диҳад.
Дар бозии аввал дар дақиқаи 18-ум соҳибони майдон баъди иҷрои зарбаи 11-метра аз ҷониби Рикардо Родригес ба сафи пеш баромаданд. Максимилиан Арнолд баъди 7 дақиқа бартарии мизбононро бештар кард. Натиҷаи ин вохӯрӣ бозингарони дастаи «Реал»-ро маҷбур мекунад, ки дар бозии ҷавобӣ тамоми имконияташонро истифода баранд, то аз натиҷаи ду вохӯрӣ ба бозиҳои минбаъда роҳхат гиранд, агар не, пас дастаи «Волфсбург» аввалин маротиба метавонад ба бозиҳои нимниҳоии Лигаи чемпионҳои Аврупо роҳ ёбад.