КМТ: Тақдими 1600 адад китоб ба китобхонаи як мактаби ноҳияи Варзоб

Душанбе, 26.04.2016. /АМИТ«Ховар»/. Китобхонаи миллии Тоҷикистон ба китобхонаи мактаби рақами 46-и  деҳаи Шодоби ноҳияи Варзоб 1600 адад китоб  ва зиёда аз 300 буклет, китобчаву варақаҳои  таблиғотиро  тақдим намуд. Дар маросими тақдими китобҳо зиёда  аз 400 нафар хонандагону омӯзгорони  мактаб ҳузур доштанд.
Намояндагони  Китобхонаи миллии Тоҷикистон   зимни эҳдои китобҳо ба хонандагони мактаб дар бораи нақш ва аҳамияти китобу китобхонӣ дар ташаккули хислатҳои ҳамидаи  инсонӣ  изҳори андеша намуда, онҳоро ба дӯст доштан ва  мутолиа намудани китоб даъват намуданд.
Хонандагон  низ дар бораи  аниси кунҷи танҳоӣ  ва   фазилатҳои он   шеър  қироат намуда, саҳначаҳои ҷолиб намоиш доданд. Ҳамзамон дар мактаб  Фестивал- озмуни китоб  роҳандозӣ шуд, ки дар он намояндагон аз Иттифоқи нависандагон ва дигар созмонҳои эҷодии кишвар  ҳузур доштанд.
Меҳмонони Фестивал  аз  иқдоми наҷиби Китобхонаи миллии  Тоҷикистон  изҳори хушнудӣ  намуда, ба хонандагони мактаб дар бораи китобу китобхонӣ маслиҳатҳои муфид доданд.