Ғолибони олимпиадаи ҷумҳуриявӣ муайян гардиданд

Душанбе, 20.04.2016 /АМИТ Ховар/. 16 -17 апрели соли равон олипиадаи ҷумҳуриявии даставӣ дар Мактаби президентӣ барои хонандагони болаёқати шаҳри Ҳисор баргузор шуд.
Тавре аз Вазорати маориф ва илми ҷумҳурӣ ба АМИТ «Ховар» хабар доданд, дар олимпиада 327 нафар хонандаи муассисаҳои таълимии ҷумҳурӣ иштирок намуда, аз онҳо 60 нафар соҳиби ҷойҳои ифтихорӣ, аз ҷумла, 15 нафар соҳиби ҷойи аввал, 17 нафар соҳиби ҷойи дуюм ва 28 нафар соҳиби ҷойи сеюм шуданд.
Натиҷаҳои олимпиадаи ҷумҳуриявии даставӣ нишон дод, ки дастаи Муассисаи давлатии таълимии «Литсей барои хонандагони болаёқат» дар шаҳри Душанбе бо гирифтани 9 ҷойи ифтихорӣ сазовори ҷойи 1-ум, дастаи «Литсей-интернати президентӣ барои кӯдакони болаёқат» дар шаҳри Душанбе бо гирифтани 4 ҷойи ифтихорӣ сазовори ҷойи 2-юм, дастаи Муассисаи давлатии таълимии «Мактаби президентӣ барои хонандагони болаёқат» дар ноҳияи Данғараи вилояти Хатлон бо гирифтани 2 ҷойи ифтихорӣ сазовори ҷойи 3-юм гардиданд.
Таҳлили муқоисавии байни муассисаҳои таҳсилоти миёнаи умумии вилоят ва минтақаҳо нишон дод, ки муассисаҳои таълимии вилояти Суғд бо гирифтани 16 ҷойи ифтихорӣ (7 нафар — ҷойи 1, 4 нафар дуюм ва 5 нафар ҷойи сеюм) мақоми аввал, муассисаҳои таълимии шаҳри Душанбе бо ишғоли 14 ҷойи ифтихорӣ (3 нафар — ҷойи якум, 5 нафар -дуюм ва 6 нафар ҷойи сеюм) мақоми дувум ва муассисаҳои таълимии вилояти Хатлон бо гирифтани 6 ҷойи ифтихорӣ (1 нафар — ҷойи дуюм ва 5 нафар — сеюм) мақоми сеюмро ба даст оварданд.
Ғолибони олимпиадаи бо ҷом, медалҳои рамзӣ, Ифтихорнома ва туҳфаи хотиравии Вазорати маориф ва илми Ҷумҳурии Тоҷикистон сарфароз гардонида шуданд.