Рӯзи илм дар Академияи илмҳо

Душанбе, 8.04.2016. /АМИТ “Ховар”/. 12 апрели соли равон дар Академияи илмҳои Ҷумҳурии Тоҷикистон маҷлиси ботантана бахшида ба иди касбии олимон-Рӯзи илм доир мегардад.
Тавре, ки котиби матбуоти АИ ҶТ Шервони Умриддин хабар дод, дар маҷлиси тантанавӣ бахшида ба Рӯзи илм, гузоштани гулчанбарҳо дар пояи нимпайкараҳои олимони барҷастаи тоҷик С. Айнӣ, Б. Ғафуров, С. Умаров ва М. Осимӣ аз соати 08:00 то 09:00 дар назар аст.
Сипас дастовардҳои илмии муассисаҳои илмии АИ ҶТ дар саҳни бинои Раёсати АИ ҶТ ба намоиш гузошта мешаванд.
Дар ин рӯз маросими супоридани дипломҳо ба олимоне, ки дар соли 2016 соҳиби ҷоизаҳои АИ ҶТ ба номи олимони барҷаста ва супоридани дипломҳо ба ректорони муассисаҳои таҳсилоти олии ҷумҳурӣ аз рӯи натиҷаи Олимпиадаи АИ ҶТ барои дарёфти “Ҷоми АИ ҶТ” дар назар дошта шудааст.
Маърӯзаҳои илмии олимоне, ки ба ҷоизаҳои олимони барҷаста сарфароз гардида шудаанд, мавриди баррасӣ қарор хоҳанд гирифт.