Вайронкунандагони қонун ба ҷавобгарии маъмурӣ кашида шуданд

Апрель 25, 2016 15:27

Душанбе, 25.04.2016 /АМИТ«Ховар»/. Аз Маркази матбуоти Прокуратураи генералии Ҷумҳурии Тоҷикистон иттилоъ доданд, ки аз ҷониби кормандони мақомоти мазкур ҳолати иҷрои Қонун «Дар бораи танзими анъана ва ҷашну маросимҳо дар Ҷумҳурии Тоҷикистон» дар мақомоти иҷроияи ҳокимияти давлатии шаҳри Душанбе, ноҳияҳои он, вазорату идораҳо ва корхонаю муассисаҳои ҳудуди шаҳр мавриди санҷиш қарор гирифт.
Санҷишҳои прокурорӣ  муайян карданд, ки  ҳанӯз ҳам дар баъзе корхонаву ташкилот, ки зиёда аз 30 нафар корманд доранд, комиссияҳои ҷамъиятӣ оид ба танзими анъана ва ҷашну маросимҳо таъсис дода нашудаанд. Аз ҷумла,  дар ноҳияҳои Шоҳмансур  104, Сино  46, Исмоили Сомонӣ  34 ва Фирдавсӣ 14 адад корхонаву ташкилот ва муассисаҳо комиссияҳои мазкурро таъсис надодаанд, ки бар хилофи талаботи моддаи 4 Қонуни мазкур мебошад.
Нисбат ба роҳбарони ташкилот ва муассисаҳои мазкур бо моддаи 481 Кодекси ҳуқуқвайронкунии маъмурии Ҷумҳурии Тоҷикистон парвандаи ҳуқуқвайронкунии маъмурӣ оғоз гардида, онҳо ба ҷавобгарии маъмурӣ кашида шуданд.
Дар хадамотҳои зиддиинҳисорӣ, назорати давлатии фаъолияти санитарию эпидемиологӣ, вазоратҳои маориф ва илм, рушди иқтисод ва савдо, фарҳанг, меҳнат, муҳоҷират ва шуғли аҳолӣ, Кумитаи ҳифзи муҳити зист, Агентии стандартизатсия, метрология, сертификатсия ва нозироти савдо ва ташкилоти дигар комиссияҳои ҷамъиятӣ ташкил ёфта бошанд ҳам, вале онҳо бо комиссияи доимии ҳудудӣ ҳамкорӣ надошта, оид ба фаъолияти худ ягон ҳисобот пешниҳод накардаанд.
Санҷишҳои прокурорӣ дар фаъолияти маъмурияти тарабхонаҳо, ҳунармандон ва шаҳрвандони алоҳида низ камбудию қонунвайронкуниҳои зиёд, ба монанди бо шумораи аз меъёр зиёди даъватшудагон додани зиёфат ва оши тӯй,  бо теъдоди зиёди мошинҳои сабукрав гузаронидани маросими ақди никоҳ ва ғайраҳоро ошкор намуданд.
-Қонунвайрокуниҳои мазкур шаҳодати онанд, ки комиссияҳои доимӣ оид ба танзими анъана ва ҷашну маросимҳои миллии мақомоти иҷроияи маҳаллии ҳокимияти давлатӣ дар шаҳри Душанбе ва ноҳияҳои он, комиссияҳои ҷамъиятии вазорату идораҳо, корхонаву муассисаҳо фаъолияти худро ба таври дахлдор ба роҳ намонда, корҳои фаҳмондадиҳиро дар байни аҳолӣ ҷоннок накардаанд, ки дар натиҷа як қатор шаҳрвандон аз надонистани меъёрҳои қонун даст ба содир намудани ин қабил қонунвайронкуниҳо задаанд,-  изҳор дошт манбаъ.

Апрель 25, 2016 15:27

Хабарҳои дигари ин бахш

ТАҒЙИРЁБИИ ИҚЛИМ. Чӣ гуна худ ва атрофиёнро аз чангу ғубор муҳофизат намоем?
МАСЛИҲАТИ МУТАХАССИС. Барои фоиданокӣ қаламфури булғориро бе коркард, дар шакли тару тоза истифода баред
Дар шаҳри Бӯстон сохтмони корхонаи муосири забҳи парранда идома дорад
Имрӯз дар Тоҷикистон чангу ғубор ба амал меояд
Бо гузашти 28 сол аҳамияти Ваҳдати миллӣ дар рушди иқтисодии Тоҷикистон бештар эҳсос мешавад
Фаъолияти иҷтимоӣ ва фарҳангӣ яке аз воситаҳои муассири таҳкими ваҳдати миллӣ мебошад
Муовини Раиси ноҳияи Данғара Зуҳро Ҳакимзода: «Мардум ба Пешвои миллат боварӣ ва эътимод дорад»
Тоҷикистон дар партави ваҳдати миллӣ ба сӯи шукуфоии нав қадам мегузорад
ВАҲДАТИ МИЛЛӢ — ПОЯИ ҲАСТИИ ДАВЛАТ ВА НЕРУИ СОЗАНДАИ МИЛЛАТ. Мулоҳизаҳои ректори Донишгоҳи давлатии Кӯлоб
Имрӯз дар Тоҷикистон ҳаво то 37 дараҷа гарм мешавад
Дар Вазорати адлия бахшида ба Рӯзи Ваҳдати миллӣ ҳамоиши идона доир гардид
Дар Агентии авиатсияи гражданӣ бахшида ба Рӯзи Ваҳдати миллӣ ҳамоиши тантанавӣ доир шуд