Афзоиши истеҳсоли маҳсулоти саноатӣ дар чор моҳ

Гулистон, 22.05.2016. /АМИТ «Ховар»/. Нишондиҳандаҳои истеҳсолии корхонаҳои саноатии шаҳри Гулистон дар чор моҳи сипаришудаи соли равон дар қиёс ба ҳамин давраи соли 2015 басо назаррасанд. Дар ин фосила корхонаҳои саноатии шаҳр дар ҳамаи шаклҳои моликият ба маблағи 516 миллиону 731 ҳазор сомонӣ маҳсулот истеҳсол намуданд, ки ин нишондод назар ба ҳамин давраи соли гузашта — 136,9 дарсад ё ин ки 139 миллиону 390 ҳазор сомонӣ зиёд мебошад. Ба иттилои Рустами Одизода, сардори хадамоти матбуотии раиси шаҳри Гулистон, дар ин давра аз ҷониби ҳамаи корхонаҳо қадаме ба пеш гузошта шуда, теъдоди коргарон назар ба соли гузашта зиёда аз 200 нафар, музди маош 594 сомонӣ афзудааст.
Дар ин ҷода чун ҳамешагӣ корхонаҳои кўҳӣ-саноатии Тоҷикистону Чин, КМ «Апрелевка», ҶДММ «Хубон», «Чархи гандум», «Фаровон», «Муҳаммад Наҷот» дар сафи пеш қарор доранд.