Агентии зидди коррупсия нашъаҷаллобонро дастгир намуд

Душанбе, 16.05.16. /АМИТ «Ховар»/. Аз ҷониби кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон чанд нашъаҷаллобон боздошт гардиданд.
Тавре ки ба АМИТ «Ховар» аз маркази матбуоти агентии мазкур хабар доданд, рӯзҳои гузашта кормандони Агентии назорати давлатии молиявӣ ва мубориза бо коррупсия муайян намуданд, ки дар шаҳри Хуҷанд шаҳрванд Музаффар Азамов бо мақсади ба соҳибияти каси дигар додани моддаҳои психотропӣ ба миқдори махсусан калон, бо шаҳрвандон Фарҳод Шарипов ва Муҳиддин Вайсов маслиҳати пешакӣ намуданд, ки ба муомилоти ғайриқонунии моддаҳои психотропӣ машғул шаванд. Зимни гузаронидани чорабиниҳои фаврӣ-ҷустӯҷӯӣ дар шаҳри Душанбе аз дохили мошини тамғаи «Шевралет Каприз», як борхалтаи полиэтилении кабудранги ба шаҳрвандон М. Азамов, Ф. Шарипов, М. Вайсов ва Н. Алиназаров тааллуқдошта ба миқдори зиёда аз 8650 адад ҳабҳои рангашон кабуди секунҷаи камоншакл бо расми «буқа» ёфта гирифта шуд, ки дар бозори сиёҳ нархи як адад ҳаб 20 доллари амрикоӣ буда, маблағи умумии ин ҳабҳо тахминан маблағи 200 000 доллари амрикоиро ташкил медиҳад.
Ба иттилои манбаъ, ҳабҳои мусодирашуда моддаи психотропии навъи «МДМА» буда, вазни умумии онҳо 1 кг 908 граммро ташкил медиҳад. Оид ба ҳолати мазкур нисбат ба Музаффар Азамов, Фарҳод Шарипов, Муҳиддин Вайсов ва Низомиддин Алиназаров бо аломатҳои моддаи 200 қисми 4 банди «д» Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, тафтишот идома дорад.