Ҳамоиши «САSA-1000 ва дурнамои ҳамкории минтақавии энергетикӣ» дар Китобхонаи миллии Тоҷикистон идома ёфт

Душанбе, 11.05.2016./АМИТ«Ховар»/.Имрӯз баъди зуҳр дар Китобхонаи миллии Тоҷикистон ҳамоиш дар мавзӯи «САSA-1000 ва дурнамои ҳамкориҳои минтақавии энергетикӣ» идома ёфта, Давлаталӣ Саид, муовини якуми Сарвазири Ҷумҳурии Тоҷикистон аз номи Ҳукумати Ҷумҳурии Тоҷикистон дар назди иштирокдорони он сухан гуфта, зикр намуд, ки татбиқи лоиҳаи мазкур имкон медиҳад, ки камчинии неруи барқ дар мавсими сармо ба танзим даромада, рушди устувори соҳаи энергетика ба роҳ монда шавад. Ин дар навбати худ воситаи воқеӣ барои ноил гардидан ба ҳадафҳои рушд, аз ҷумла истиқлолияти энергетикии Тоҷикистон хоҳад гардид.
Зимни суханронӣ дар ҳамоиш хонум Аннет Диксон, муовини Президенти Бонки умумиҷаҳонӣ оид ба минтақаи Осиёи Ҷанубӣ, Даниел Розенблум, мушовири котиби давлатии ИМА оид ба Осиёи Марказӣ ва хонум Тизиана Бонапасе, роҳбари Дафтари минтақавии Комиссияи иқтисодӣ ва иҷтимоии СММ барои Осиё ва Уқёнуси Ором лоиҳаи «CASA-1000»-ро, ки пагоҳ дар Душанбе маросими расмии татбиқи он бо иштироки Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, Сарвазири Ҷумҳурии Исломии Покистон Муҳаммад Навоз Шариф, Раиси Ҳукумати ваҳдати миллии Афғонистон доктор Абдулло Абдулло ва Сарвазири Ҷумҳурии Қирғизистон Сооронбай Жээнбеков баргузор мегардад, табрик гуфта, онро қадами устувор дар роҳи истиқлолияти энергеткии Тоҷикистон, ҳамчунин рушди кишварҳои минтақа арзёбӣ намуданд.