Аввалин мусовии «Истиқлол» ва аввалин имтиёзи «Равшан» дар мавсими соли 2016

Душанбе, 22.05.2016 /АМИТ «Ховар»/. Дирӯз чемпиони мамлакат «Истиқлол»-и Душанбе дар даври ҳафтуми Чемпионати Тоҷикистон оид ба футбол байни дастаҳои Лигаи олӣ  бо «Хайр»-и Ваҳдат қувва озмуда, бо натиҷаи 0:0 онро ҷамъбаст кард, ки ин аввалин мусовии истиқлолиҳо дар мавсими соли 2016 мебошад.
«Равшан»-и Кӯлоб дар рақобат бо «Парвоз» баъди нимаи аввал бо натиҷаи 3:1 дар сафи пеш буд, аммо меҳмонон нагузоштанд, ки соҳибони майдон ба комёбӣ мушарраф шаванд ва натиҷаро 3:3 мусовӣ карданд. «Равшан» соҳиби аввалин хол дар мавсими ҷадид гардид.
Вохӯрии ниҳоят ҷолиб дар варзишгоҳи «Пахтакор»-и шаҳри Қурғонтеппа ба амал омад. «Вахш» КМВА «Помир»-ро ба ҳузур пазируфт. Нимаи аввал бо бартарии меҳмонон паси сар шуд ва «Вахш» ду голро аз дарвозааш гирифт. Дар нимаи дуввум соҳибони майдон ба худ омада, бо хатоии дарвозабони меҳмонон Фатҳулло Бобоев ҳисобро баробар карданд ва баъди аз майдон ронда шудани Худойдод Узоқов(61) 10 нафара ба задани ду гол мушарраф шуда, бо натиҷаи 3:2 ғолиб омаданд.
Дар ин давр «Ҳосилот» бар «Хуҷанд» (1:0) ва «Барқчӣ» бар «Регар ТадАз» (2:1) пирӯз гардиданд.
Ба ҳамин тартиб, «Истиқлол» бо 19, «Ҳосилот» бо 14 ва «Хайр» бо 11 хол дар зинаҳои болоӣ қарор доранд.