Дар АНМН ҷаласаи ситод оид ба гузаронидани амалиёти «Кӯкнор-2016 баргузор гардид

Душанбе, 19. 05.16./АМИТ «Ховар»/. 18 май дар Агентии назорати маводи нашъаовари назди Президенти Ҷумҳурии Тоҷикистон ҷаласаи якуми Ситоди ҷумҳуриявии амалиёти Кӯкнор-2016 баргузор гардид.
Тавре ки ба АМИТ «Ховар» аз маркази матбуоти агентии мазкур хабар доданд, ҷаласа бо мақсади амалӣ намудани Стратегияи миллии мубориза бар зидди гардиши ғайриқонунии маводи мухаддир дар Ҷумҳурии Тоҷикистон барои солҳои 2013-2020 ва мутобиқи Фармоиши Роҳбари Дастгоҳи Иҷроияи Президенти Ҷумҳурии Тоҷикистон доир шуд ва дар он масъалаҳои ташкилӣ оид ба гузаронидани амалиёти Кӯкнор-2016, инчунин ҳамкории вазорату идораҳои дахлдор баррасӣ гардиданд.
Ба иттилои манбаъ, нақшаи чорабиниҳои Ситоди ҷумҳуриявӣ оид ба гузаронидани амалиёти Кӯкнор-2016 тасдиқ гардид ва масъалаҳои  ташкили ҳамкорӣ бо мақомоти ҳифзи ҳуқуқ ва вазорату идораҳои дахлдор бо мақсади коркарди амалҳои якҷоя оид ба пешгирии самтҳои интиқол, истеҳсол ва фурӯши воситаҳои нашъадор, ошкор ва нобуд сохтани кишти бангдонаҳои худрӯй ва гузаронидани корҳои фаҳмондадиҳӣ дар байни аҳолиро дар бар мегирифт .
Барои амалӣ намудан, назорат ва ҳамоҳанг сохтани фаъолияти мақомоти ҳифзи ҳуқуқ, сохторҳои қудратӣ ва ҳокимияти маҳаллӣ дар шаҳри Душанбе, ВМКБ, вилоятҳо, шаҳру ноҳияҳо ситодҳои корӣ ташкил гардидаанд.
Амалиёти «Кӯкнор» дар қаламрави Ҷумҳурии Тоҷикистон ҳамасола дар ду марҳила — аз 20 май то 31 август ва аз 1 сентябр то 30 ноябр гузаронида мешавад.