Дар Душанбе V-умин Ҷашнвораи байналмилалии театрии «Нигоҳи нав» барпо мегардад

Душанбе,16.05.2016 /АМИТ «Ховар»/. Дар шаҳри Душанбе дар Театри давлатии ҷавонон ба номи Маҳмудҷон Воҳидов аз 16 то 20 майи соли равон V-умин Ҷашнвораи байналмилалии театрии «Нигоҳи нав» баргузор мегардад. Дар ҷашнвора аз Ҷумҳуриҳои Қазоқистон 2 , аз Қирғизистон 1 ва аз Тоҷикистон 4 театр намоишномаҳои омоданамудаашонро пешниҳоди тамошобинон мегардонанд.
Дар суҳбат бо хабарнигори АМИТ «Ховар» Далери Имомалӣ, роҳбари бадеии V-умин Ҷашнвораи байналмилалиии театрии «Нигоҳи нав» зикр намуд, ки ин намоишномаи театрӣ тӯли 4 сол ба тариқи Фестивал-озмун гузаронида шуд. Имсол ба муносибати 5 -солагии баргузоршавӣ он дар шакли Фестивал барпо мегардад ва ҳадафи асосии он дарёфти коргардону ҳунармандони боистеъдод, сабку усулҳои нави театрӣ буда, дар намоишномаҳои он ҳунармандони то 35- сола нақш меофаранд.
Далери Имомалӣ ҳамчунин иттилоъ дод, ки аз ҷониби ҳунармандони қазоқ намоишномаҳои «Палата», «Шоҳ Лир», ҳунармандони қирғиз «Берушдӣ», Театри давлатии мусиқӣ -драмавии ба номи Т.Фозиловаи шаҳри Конибодом «Суди девонагон», Театри давлатии ҷавонон ба номи Маҳмудҷон Воҳидов «Ҷеғи бунафш» ва донишҷӯёни Донишкадаи давлатии санъати Тоҷикистон ба номи Мирзо Турсунзода «Журналист» манзури тамошобинон мегарданд.
Хотиррасон менамоем, ки имрӯз маросими кушодашавии V-умин Ҷашнвораи байналмилалиии театрии «Нигоҳи нав» оғоз гардида, коргардонону ҳунармандони варзидаи театрҳои номбаршуда истифодаи шаклу усулҳои нави театриро ба санъаткорони ҷавон меомӯзанд.