Дар Суғд 1000 хонандаву донишҷӯи беҳтарин ба истироҳати ройгон фаро гирифта мешаванд

Душанбе, 24.05.2016 /АМИТ «Ховар»/. Дар вилояти Суғд 1000 хонандаву донишҷӯи беҳтарин ба истироҳати ройгон фаро гирифта мешаванд. Ин нуктаро раиси вилояти Суғд Абдураҳмон Қодирӣ дар чорабиние, ки бахшида ба Рӯзи ҷавонони Тоҷикистон баргузор шуд, ҷиҳати ба истироҳати ройгон фаро гирифта шудани 800 нафар хонандагони фаъоли мактабҳои таҳсилоти миёнаи умумии шаҳру ноҳияҳо, иштирокчиёни озмуну олимпиадаҳо, сессияи вилоятиву ҷумҳуриявии Академияи хурди илмҳо таъкид намуд. Чорабинӣ бегоҳии 23 май дар Амфитеатри Қасри Арбоб доир шуд ва дар он беш аз 8 ҳазор нафар ҷавонон ҳузур доштанд.
Илова бар ин, дар фасли тобистон аз ҳисоби беҳтарин донишҷӯёни муассисаҳои олии вилоят, ки бо баҳои аъло таҳсил дошта, дар корҳои ҷамъиятӣ фаъолона ширкат меварзанд, 200 нафар барои истироҳат дар истироҳатгҳҳои ҳудуди вилоят ҷалб хоҳанд шуд.