Дар Суғд маросими ҷамъбастии чорабиниҳои «20 рӯзи ҷавонӣ» доир мегардад

Душанбе, 19.05.2016 /АМИТ «Ховар»/. Дар маркази вилояти Суғд — шаҳри Хуҷанд   20 майи соли равон   маросими  ҷамъбастии   чорабиниҳои «20 рӯзи ҷавонӣ» бахшида ба таҷлили Рӯзи ҷавонони Тоҷикистон таҳти унвони «Ҷавонон — пайрави Пешвои миллат ва муҳофизони дастовардҳои 25 соли Истиқлолияти давлатии Ҷумҳурии Тоҷикистон!»  баргузор гардида,  устодони санъат бо барномаи консертӣ  табъи  иштирокдорони онро  болида мегардонанд.
Хотиррасон менамоем, ки  ба муносибати Рӯзи ҷавонони Тоҷикистон  дар вилоят дар «20 рӯзи ҷавонӣ» силсилачорабиниҳо, аз ҷумла ҳамоишҳо зери унвони «Аз тағйиру иловаҳо ба Конститутсия ҷонибдорӣ менамоем!», «Дастгирии рушди соҳибкории ҷавонон дар шаҳри Хуҷанд», чорабиниҳои омӯзишии «Муаррифии  туризми дохилӣ ба хонандагон», мусобиқаҳои варзишии «Шоҳмот барои таҳкими неруи зеҳнӣ ва пешгирии ифротгароӣ», «Мусобиқаи  бокс байни наврасон», маҳфили Хушдилон ва ҳозирҷавобон-дарёфти чеҳраҳои нав»,  «Шанбегии умумишаҳрии ҷавонон»  «Аёдати ҷавонони ниёзманд» ва ғайраҳо доир гардиданд, ки  ҷавонони вилоят аз онҳо таассуроти амиқ бардоштанд.