Ду ҳафта муҳлат барои аз байн бурдани иншооти ғайриқонунии ёрирасон

Душанбе, 12.05.2016./АМИТ «Ховар»/.Мақомоти иҷроияи ҳокимияти давлатӣ дар шаҳри Душанбе натиҷаи фаъолияти дуҳафтаинаи гурӯҳҳои кории ноҳияҳои шаҳрро нокифоя арзёбӣ намуд.
Дар иртибот ба ин ба гурӯҳҳои корӣ дастур дода шудааст, ки дар тӯли ду ҳафта дар ҳамкорӣ бо мақомоти марбутаи ҳифзи ҳуқуқ барои аз байн бурдани ҳолатҳои ошкоргардидаи ғасбу худсарона иҳота намудани қитъаҳои замини назди биноҳои бисёрошёнаи ҳудуди шаҳраку маҳаллаҳо ва бунёди иншооти ғайриқонунию ёрирасони ба фарҳанги шаҳрнишинӣ бегона, инчунин ободонии биноҳо, роҳу ҳудуди маҳалҳо ва каналу селпартоҳо тадбирҳои таъхирнопазир андешанд.
Бояд тазаккур дод, ки гуруҳҳои корӣ дар доираи 130 рӯзи ободонии пойтахт дар иртибот ба омодагии ҳамаҷониба ба таҷлили сазовору пуршукӯҳи ҷашни 25-солагии Истиқлолияти давлатии Ҷумҳурии Тоҷикистон дар шаҳри Душанбе аз 26 апрели соли равон таъсис дода шудаанд.