Имтиҳони футболбозони дастаи мунтахаби Тоҷикистон оид ба футбол дар варзишгоҳи марказии пойтахт

Душанбе, 26.05.2016 /АМИТ «Ховар»/. Имрӯз соати 20 дар варзишгоҳи марказии шаҳри Душанбе сармураббии нави дастаи мунтахаби кишварамон Ҳаким Фузайлов дар як вохӯрии таҷрибавӣ ва санҷишии дӯстона бо тими легионерҳои Тоҷикистон ҳайати дастаи мунтахабро аз назар мегузаронад.
Сар аз 23 май дастаи мунтахаби миллии футболи Тоҷикистон омодагиро ба бозиҳои плей-оффи Ҷоми Осиё-2019 бо тими мунтахаби Бангладеш, ки 2 июн дар Душанбе ва 7 июн дар шаҳри Дакка мегузаранд, шурӯъ намуд.
Ба ҳайати даста Ҳаким Фузайлов 29 бозингар — 4 дарвозабон, 10 ҳимоятгар, 10 нимҳимоятгар ва 5 ҳамлагарро даъват кардааст.
Се легионер — дарвозабони «Олой»-и шаҳри Ӯши Қирғизистон Абдуазиз Маҳкамов, ҳимоятгари  тими «Газовик»-и Оренбург  Фарҳод Восиев ва ҳамлагари дастаи «Динамо»-и Брест Ҷаҳонгир Эргашев низ номнавис шудаанд.
Дар ҳайати мураббиён низ тағйирот ба мушоҳида мерасад. Дар бозии таҷрибавие, ки дастаи мунтахаб ҳафтаи гузашта ба ду гурӯҳ ҷудо шуда, бо ҳам рақобат кард, ёварони Ҳаким Фузайлов- Рустам Хоҷаев ба як гурӯҳ машқ медоду ба гурӯҳи дигар футболбози шӯҳратёри  тоҷикистонӣ  Виталий Левченко.
Виталий Левченко ба Ҳаким Фузайлов ҳамчун ёвар кумак мекунад ё не хабари аниқе ба мо нарасидааст, аммо ӯ дар варзишгоҳ ҳузур дошт ва ба бачаҳо тамрин медод.
Ба ин савол мо имрӯз баъди бозии санҷишии даста ҷавоб хоҳем гирифт.