Кормандони ВКД 3 шаҳрвандро бо зиёда аз 34 кило маводи нашъадор дастгир намуданд

Душанбе, 13.05.16./АМИТ «Ховар»/. Дар натиҷаи гузаронидани чорабиниҳои фаврию ҷустуҷӯӣ аз ҷониби кормандони милитсия марди 30-солаи сокини ноҳияи Рӯшон ҳамчун гумонбар дар муомилоти ғайриқонунии маводи нашъадор дастгир карда шуд.
Тавре ки сомонаи расмии Вазорати корҳои дохилии ҶТ хабар медиҳад, дар вақти кофтукови шахсӣ аз дохили борхалтаи ин шаҳрванд 10 килою 852 грамм маводи нашъадори навъи ҳашиш дарёфт ва мусодира гардид.
Ҳамчунин дирӯз дар ҳудуди ҷамоати деҳоти Гулшани ноҳияи Фархор кормандони ҳифзи ҳуқуқ мошини сокини ноҳияи Ҳамадониро боздошт намуданд, ки ҳангоми азназаргузаронии он 20 кило маводи нашъадори навъи ҳашиш мусодира карда шуд. Баъдан, ҳангоми азназаргузаронии хонаи истиқоматии номбурда, кормандони милитсия боз 1 кило маводи нашъадори навъи ҳашиш дарёфт намуданд.
Ғайр аз ин, ҳамон рӯз дар ҳудуди ноҳияи Ҳамадонӣ кормандони милитсия марди 27-солаи сокини ҳамин ноҳияро дастгир намуданд, ки дар вақти кофтукови шахсӣ аз дохили пакети полиэтиленӣ 2 килою 300 грамм маводи нашъадори навъи ҳашиш дарёфт ва мусодира карда шуд.
Маводи гирифташуда дар маҷмӯъ 34 килою 152 граммро ташкил медиҳад.
Нисбат ба далелҳои мазкур парвандаҳои ҷиноятӣ оғоз гардида, тафтишот идома дорад.