«Мо тоҷикон»: Парчами Тоҷикистон дар кӯчаҳои Берлин ва дигар шаҳрҳои Аврупо!

Душанбе, 13.05.2016. /АМИТ «Ховар»/. Баъд аз тай намудани ҳазорҳо километр ва боздид аз кишварҳои гуногуни Иттиҳоди Аврупо иштирокчиёни мотто-марафони «Мо тоҷикон» Форис Нурмуҳаммадов, Фарҳод Калонов, Ширин Эшназарова ва Сановбар Калонова вориди пойтахти Олмон- шаҳри Берлин гардиданд.
Тавре ки аз Сафорати Тоҷикистон дар Олмон хабар доданд, 12 май иштирокчиёни мотто -марафон меҳмони сафорат гардиданд. Онҳо ба Сафири Тоҷикистон дар Олмон Маликшо Неъматов оид ба нақшаи сафари худ иттилоъ доданд. Мақсади асосии ин марафон бурдани парчами Тоҷикистон ба ҳар гӯшаву канори қитъаи Аврупо ва расонидани паёми мардуми тоҷик ба сокинони ин давлатҳо мебошад.
Маликшо Неъматов зикр намуд, ки ин амал туҳфаи хуб ба истиқболи 25- солагии Истиқлолияти давлатии Ҷумҳурии Тоҷикистон мебошад.
Иштирокчиёни мото — марафон бо кормандони сафорат аз маҷмааи поси хотири ҷанговарони Ҷанги дуюми ҷаҳон дар хиёбони Тиергартени шаҳри Берлин дидан намуда, ба хотири падарони қаҳрамон гулгузорӣ карданд.