Нақшаи даъвати шаҳрвандон ба хизмати ҳарбӣ 88 фоиз иҷро шуд

Душанбе, 11.05.16 /АМИТ «Ховар»/. Иҷрои нақшаи даъвати шаҳрвандон ба хизмати ҳатмии ҳарбӣ дар ҷумҳурӣ 88 фоиз иҷро шуд.
Тавре ки ба АМИТ «Ховар» аз маркази матбуоти Вазорати мудофиаи ҶТ хабар доданд, ҳамчунин то имрӯз иҷрои нақша дар ВМКБ 93 фоиз, дар вилояти Суғд 84 фоиз, комиссариатҳои ҳарбии ноҳияҳои тобеи марказ 83 фоиз ва дар чаҳор навоҳии пойтахт дар давоми 40 рўзи ин чорабинии муҳими сиёсӣ 66 фоизро ташкил медиҳад.
Шаҳру ноҳияҳои вилояти Хатлон, чор ноҳияи Вилояти Мухтори Кўҳистони Бадахшон ва ҳафт шаҳру навоҳии вилояти Суғд нақшаи даъвати шаҳрвандон ба хизмати ҳатмии ҳарбиро пурра иҷро намуданд.
Ёдовар мешавем, ки даъвати баҳории шаҳрвандон ба хизмати ҳатмии ҳарбӣ, аз 1 апрел дар тамоми шаҳру навоҳии мамлакат оғоз гардида, он то 31 май идома меёбад.
Қобили зикр аст, ки дар баробари даъвати ҷавонписарони аз 18 то 27- солаи Ҷумҳурии Тоҷикистон, инчунин тибқи талаботи ин фармон ва мутобиқи моддаи 7 Қонуни Ҷумҳурии Тоҷикистон «Дар бораи мудофиа» хизматчиёни ҳарбие, ки муҳлати муқарраргардидаи хизмати ҳарбиро адо намудаанд, моҳҳои апрел-майи соли 2016 аз сафи Қувваҳои Мусаллаҳи Ҷумҳурии Тоҷикистон, қўшунҳои сарҳадии Кумитаи давлатии амнияти миллии Ҷумҳурии Тоҷикистон, Гвардияи миллии Ҷумҳурии Тоҷикистон, қўшунҳои дохилии Вазорати корҳои дохилии Ҷумҳурии Тоҷикистон, қўшунҳои мудофиаи граждании Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ва Бригадаи посбоникунандаи Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон ба эҳтиёт рухсат дода мешаванд.