Пирӯзии «Истиқлол» бар «Равшан» ва «Хайр» бар «Парвоз» дар Лигаи олии футболи Тоҷикистон

Душанбе, 03.05.2016 /АМИТ «Ховар»/. Ду бозии боқимондаи даври чоруми Чемпионати Тоҷикистон оид ба футбол байни дастаҳои лигаи олӣ рӯзи 1 май ба поён расид. Дастаи футболи «Истиқлол»-и Душанбе дар Варзишгоҳи марказии пойтахт бар «Равшан»-и Кӯлоб бо ҳисоби калони 7:1 пирӯз шуд. Дар бозии дигар дастаи «Хайр»-и Ваҳдат дар меҳмонӣ бар «Парвоз»-и Бобоҷон Ғафуров бо ҳисоби 3:2 ғалаба кард.
Ёдовар мешавем, ки се бозии даври чоруми Чемпионати Лигаи олии футболи Тоҷикистон 30 апрел барпо гардид. Дар ҳарсе бозӣ мизбонон пирӯз шуданд. Дастаи футболи ССКА «Помир»-и Душанбе бар «Ҳосилот»-и Фархор бо ҳисоби 1:0, «Вахш»-и Қурғонтеппа бар «Барқчӣ»-и Душанбе бо ҳисоби 2:0 ва «Регар-ТадАЗ»-и Турсунзода бар «Хуҷанд»-и Хуҷанд бо ҳисоби 3:0 ғолиб омаданд.
Ҳамин тариқ, «Истиқлол», ки дар ҳамаи чор бозӣ пирӯзӣ ба даст овард, бо 12 имтиёз дар ҷадвали мусобиқа пешсафи ягона шуд. Бо вуҷуди бохт «Хуҷанд бо 9 имтиёз мевқеашро дар зинаи дуюм нигоҳ дошт. «Хайр бо 8 имтиёз ба зинаи сеюм баромад.
Хотирасон менамоем, ки бозиҳои даври панҷуми мусобиқа рӯзҳои 5, 7 ва 8 май баргузор мешаванд. Рӯзи панҷшанбе «Хуҷанд» дар майдони худ бо «Истиқлол» бозӣ мекунад. Рӯзи шанбеи 7 май «Хайр» бо дастаи меҳмон — «Регар-ТадАЗ», «Ҳосилот» дар меҳмонӣ бо «Парвоз» рақобат хоҳанд кард. Рӯзи якшанбеи 8 май «Барқчӣ» бо ССКА «Помир» ва «Равшан» дар Кӯлоб бо «Вахш» вориди рақобат мешаванд.