Раъйпурсӣ: Овози мо барои ояндаи осоиштаи фарзандонамон аст

Душанбе, 22.05.2016 /АМИТ «Ховар»/. Имрӯз, 22 май аз 6-и  субҳ  дар сарораси кишварамон маъракаи муҳими сиёсӣ-раъйпурсии умумихалқӣ оид ба ворид намудани  тағйиру иловаҳо  ба Конститутсияи (Сарқонуни) Ҷумҳурии Тоҷикистон  оғоз ёфт.
Участкаи раъйпурсии №25 ноҳияи Сино, ки дар бинои ШСХК «Барқи тоҷик» ҷой гирифтааст, аз субҳ дарҳои худро ба овоздиҳандагон боз кардааст. Бино ба маълумоти котиби комиссияи участкаи раъйпурсии № 25  Саида Қурбонова, то соати 10 аллакай   31 фоизи овоздиҳандагон  ба участка омада, овоз додаанд.
«Умуман дар участкаи мо 1855 овоздиҳанда ба қайд гирифта шудааст.  Аз  ин шумора шахсони  синнашон ба  18 расида ва  бори аввал дар раъйпурсӣ иштирок мекарда 21 нафар, пиронсолони аз 80 боло 36 нафар, русзабононе, ки фақат бо забони русӣ бюллетенҳоро пур мекунанд, 109 нафар мебошанд. 20 нафар  маъюбоне, ки ба участка омада наметавонанд, имкони дар хона овоз доданро доранд. Мо  пас аз нисфирӯзӣ ба хонаҳояшон қуттиҳои сайёрро бурда, овози онҳоро мегирем»,-илова намуд С.Қурбонова.
Тавре ки котиби комиссияи участкаи раъйпурсии № 25  маълумот дод, 12 нафар  сокинони 18 сола то соати 10 аллакай омада, овози худро додаанд.  «Мо нафарони 18-соларо табрик намуда, ба ҳар яки онҳо гулдаста тақдим намудем. То ин дам ба участка ҳамагӣ 9 нафар шахсони аз  80- сола боло омаданд»,-илова намуд С Қурбонова.
Парвина Аминова, яке аз овоздиҳандагони ин участка бо шавҳар ва се фарзанди хурдсолаш барои овоздиҳӣ  омада буд.
«Мақсади мо аз овардани фарзандонамон он аст, ки мехоҳем онҳо аз хурдӣ масъулияти худро дар назди ватану миллат эҳсос  намоянд ва дарк кунанд, ки падару модарашон барои ояндаи онҳо бетараф набуда, дар чорабинии муҳими сиёсӣ овоз додаанд. Ин овози мо барои  дар кишвари ободу озод таҳсил ва зиндагӣ кардани фарзандонамон мебошад»,-гуфт П.Аминова.
Бояд гуфт, ки дар участкаи раъйпурсии №25 ноҳияи Сино  хуҷраи махсус барои модару кӯдак  омада шудааст, ки волидон метавонанд дар он ҷо фарзандонашро гузошта, бе ягон мамониат овоз диҳанд.
Инчунин дар ин участка бунгоҳи тиббӣ низ фаъол аст.