Сабаби харобшавии роҳҳои мошингард нақлиёти гаронвазн аст

Душанбе, 11.05.2016. /АМИТ «Ховар»/. Масъалаи пешгирӣ ва танзими равуои мошинҳои гаронвазн ва ҳаҷман калон, ки сабабгори харобшавии роҳҳои мошингарди ҷумҳурӣ мегарданд, зимни ҷаласаи кории Вазорати нақлиёти ҶТ баррасӣ шуд.
Тавре ки аз Вазорати нақлиёти кишвар иттилоъ доданд, дар ҷаласа кормандони мақомоти назоратӣ, гумрук, БДА, ХДНТ дар соҳаи нақлиёт, Вазорати корҳои хориҷӣ, донишмандони соҳаи нақлиётшиносии Донишгоҳи Техникии Тоҷикистон, масъулини идораю ширкатҳо ва муассисоте, ки бо мошинҳои калонҳаҷму гаронвазн сару кор доранд, иштирок намуданд.
Вазири нақлиёт Ганҷалзода Шералӣ Раҳмон иброз дошт, ки масъалаи баррасишаванда, яке аз камбудии асосии ҳанӯз ислоҳношуда мебошанд.
Сардори Раёсати нақлиёти рӯизаминии вазорат Қурбоналӣ Саидов доир ба манфиату зиёни васоити нақлиёти гаронвазни хориҷиву ватанӣ, мушкилоти ронандагони ватанӣ дар ҳудуди ҳамсоякишварҳо, душвории рақобат бо ронандагони хориҷӣ, ба расмиёти гумрукӣ даровардани ҳуҷҷатҳои расмӣ дар гумрук ва гузаргоҳҳои сарҳадӣ, зарурати ворид намудани тағйиру иловаҳо ба баъзе аз асноди меъёрӣ сухан кард. Иштирокдорони ҷаласа дар мавриди роҳҳои рафъи ин мушкилӣ изҳори андеша намуданд.