Табибони Олмон дар Душанбе нуқсони модарзодии роғи лаб ва комро ҷарроҳӣ мекунанд

Душанбе, 05.05.2016. /АМИТ «Ховар»/. Дар Маркази миллии тиббӣ, воқеъ дар шаҳри Душанбе дар ҳамкорӣ бо мутахассисони олмонӣ аз 8 то 20 майи соли равон амалиёти ҷарроҳӣ барои беморони гирифтори нуқсони модарзодии роғи лаб ва ком гузаронида мешаванд.
Тавре ки котиби матбуотии Вазорати тандурустӣ ва ҳифзи иҷтимоии аҳолии ҶТ Фотима Ғоибова иттилоъ дод, амалиёти ҷарроҳӣ ройгон гузаронида мешаванд.
Таҳлилу ташхиси то ҷарроҳӣ дар доираи қарору қонунҳои амалкунандаи соҳаи тандурустии кишвар роҳандозӣ мешаванд. Ба кӯдакону наврасон аз оилаҳои камбизоат, гурӯҳҳои ниёзманд ва кӯдакони гурӯҳи маъюбидошта мутобиқи қарор хизмат расонида мешавад,-илова намуд мусоҳиб.
Бино ба иттилои Ф.Ғоибова, амалиёти ҷарроҳӣ ба беморони гирифтори нуқсони модарзодии роғи лаб ва ком бори аввал соли 2010 дар доираи ҳамкории дуҷонибаи Ҷумҳурии Тоҷикистон ва Олмон тибқи нақшаи тасдиқшуда роҳандозӣ шуда буд. Ҷарроҳиҳои тармимӣ дар ҳамкорӣ бо мутахассисони олмонӣ гузаронида мешаванд.
То имрӯз беш аз 30 бемор номнавис шудаанд. Ҳамасола дар доираи ин ҳамкорӣ то 50 кӯдаку наврас ҷарроҳӣ карда мешаванд,- зикр намуд Ф.Ғоибова.
Ниёзмандон имкон доранд то 8 май дар бинои № 9 худро сабти ном кунанд.