Тоҷикистон макони баргузории бозиҳои интихобии Чемпионати Осиё интихоб гардид

Душанбе, 19.05.2016 /АМИТ «Ховар»/. Тоҷикистон макони баргузории бозиҳои интихобии Чемпионати Осиё байни духтарони то 19 сола интихоб гардид. Ин бозиҳо аз 29 октябр то 6 ноябри соли равон дар Варзишгоҳи марказии шаҳри Душанбе баргузор мешаванд.
Имрӯз дар Малайзия қуръакашии ин бозиҳо гузаронида мешавад, ки дар он дастаҳои Тоҷикистон, Австралия, Узбекистан, Эрон, Урдун, Мянма, Тайбэйи Чин , Фаластин, Ҳиндустон, Гонконг, Лубнон, Сингапур, Қирғизистон, ҷазираҳои Марианаи шимолӣ, Покистон,  Филиппин, Таиланд ва  Ветнам иштирок мекунанд.
Ба ҳайси мизбонони мусобиқаи интихобӣ ҳамчунин Таиланд ва  Ветнам низ пазируфта шудаанд.
Аз 18 дастаи иштирокдори 4 гурӯҳ танҳо ғолибон ба бозиҳои ниҳоии Чемпионати Осиё, ки аллакай ба он дастаҳои Кореяи Ҷанубӣ ва Шимолӣ, Япония ва Чин ҳамчун беҳтарин дастаҳои Чемпионати қаблӣ роҳхат гирифтаанд, ҳамроҳ мешаванд.
Ёдовар мешавем, ки оғози моҳи равон дар кишвари мо бозиҳои минтақавии Осиё байни духтарони то 14-сола дар дараҷаи аъло гузаронида шуд ва Тоҷикистон таҷрибаи бойи гузаронидани чунин бозиҳоро соҳиб аст.