Занону духтарони Бадахшон ҳунари адрасу атласбофӣ меомӯзанд

Хоруғ, 19.05.2016 /АМИТ «Ховар»/. Баъди эҳёи ҳунару фарҳанги миллӣ таваҷҷуҳи ҳунармандон низ ба тарзи таҳия ва бофтану  дӯхтани либосу палос, чакану сӯзаниҳо, кандакории рӯи чӯбу санг ва амсоли инҳо дар миёни ҷавонон рӯ ба афзоиш ниҳод. Инро ба назар гирифта, бахши вилоятии Маркази таълими калонсолони Ҷумҳурии Тоҷикистон феҳристи курсҳои омӯзиширо  зиёд ва теъдоди шунавандандагонашро бештар кард.
Ба гуфтаи муовини сардори Раёсати Агентии меҳнат ва шуғли аҳолӣ дар ВМКБ Наврӯзшоҳ Ҳилолов ин ҳафта 80 нафар аз ҳунарҷӯён давраҳои омӯзишии семоҳаро  хатм намуданд ва дар ҳузури директори Муассисаи давлатии Маркази таълимии калонсолони ҷумҳурӣ Шукрулло Саломов ба онҳо шаҳодатномаи тахассусӣ тақдим карда шуд.
Соли равон як гурӯҳ устодҳои  суғдӣ ба вилоят сафар намуданд ва чанд дона дастгоҳҳои қолину адрасбофиро ба марказ  туҳфа намуданд. Ҳоло як моҳ мешавад, ки 40 нафар аз духтарони  бекор ба омӯзиши  ҳунарҳои қадимии мардуми тоҷик  машғул мебошанд.