«Баланд бардоштани сатҳи маърифати молиявӣ»- машварати муштарак бо ибтикори Бонки миллӣ

Душанбе, 09.06.2016 /АМИТ «Ховар»/.  Бо ташаббуси Бонки миллии Тоҷикистон дар ҳамоҳангӣ бо Фонди хазинаи амонатӣ ва муносибатҳои байналмилалии Олмон ва Вазорати маориф ва илми Ҷумҳурии Тоҷикистон татбиқи барномаи махсус оид ба «Баланд бардоштани сатҳи маърифати молиявӣ» барои аҳолии кишвар давом дорад.
Давраи дуюми машварати мазкур 6 июн оғоз ёфта, то 1 июли соли равон, дар Донишкадаи ҷумҳуриявии такмили ихтисос ва бозомӯзии кормандони соҳаи маориф барои омӯзгорони мактабҳои таҳсилоти умумии ҷумҳурӣ идома меёбад.
Бино ба маълумоти БМТ, мақсад аз ташкили чорабинии мазкур омӯзонидани роҳу усулҳои муосир ва шавқовари баргузории дарсҳо аз фанни «Асосҳои назарияи иқтисод» ба шумор рафта, дар баробари баланд бардоштани дониши молиявии мактаббачаҳо, сатҳи маърифати молиявии омӯзгорони ин фан низ такмил дода мешавад.
Дар машварате, ки дар Донишкадаи ҷумҳуриявии такмили ихтисос ва бозомӯзии кормандони соҳаи маориф баргузор гардид, 24 нафар омӯзгори фанни «Асосҳои назарияи иқтисод» аз мактабҳои таҳсилоти умумии минтақаҳои гуногуни кишвар иштирок намуданд.
Дар назар аст, шумораи умумии омӯзгороне, ки тибқи ин барнома фаро гирифта мешаванд, то ба 2900 нафар расонида шавад.
Бонки миллии Тоҷикистон минбаъд низ барои баланд бардоштани сатҳи маърифати молиявии аҳолӣ дар ҳамоҳангӣ бо дигар сохторҳои дахлдор ҳамкориро идома хоҳад дод.