Чорабиниҳо вобаста ба ҷашни 25-солагии Истиқлолият дар китобхонаи вилоятии Хатлон

Қурғонтеппа, 11.06.2016 /АМИТ «Ховар»/. Тибқи нашқаи  чорабиниҳои китобхонаи оммавии вилояти Хатлон ба номи  Шамсиддин Шоҳин  бахшида ба 25- солагии Истиқлолияти давлатии  Ҷумҳурии  Тоҷикистон чорабиниҳои гуногун гузаронида  мешаванд. Тавре директори китобхонаи мазкур Тутиниссо  Юсупова  ба хабарнигори  АМИТ «Ховар»  иттилоъ  дод, дар китобхонаи мазкур   гушаи доимӣ   дар     мавзӯи «Тоҷикистон хонаи ободи ман»  таъсис дода  шуда,  намоиши китобҳо  дар мавзӯи «Ватан дар ҳар куҷо ояд ба сар форам ҳавои ту» баргузор гардида истодаанд.
Ҳамзамон семинари омӯзишии китобдорон дар мавзӯи  «25 соли Истиқлолият дар рушди фаъолияти китобдорӣ дар вилояти Хатлон»  ва баргузории конфронси илмӣ дар мавзӯи «Нақши китоб дар  тарбияи худогоҳӣ ва худшиносии ҷавонони замони соҳибистиқлол»  ба нақша гирифта шудааст.