Дар ноҳияи Данғара ҳосили ғалла меафзояд

Данғара, 30.06.2016 /АМИТ «Ховар»/. Дар ноҳияи Данғара барои вусъат бахшидани дарави  ғаллаи майдонҳои корами обию лалмӣ техникаи зарурӣ сафарбар шуда, кишоварзон мувофиқи дурнамо ният доранд дар майдони 1750 гектар кишти такрорӣ гузаронанд. Имрӯзҳо дар ноҳияи Данғара майдони умумии кишти ғалла зиёда аз 32 ҳазор гектарро ташкил медиҳад. Аз ҳисоби тухмиҳои хушсифат, кишти саривақтӣ, риояи қоидаҳои агротехникӣ ва мусоид омадани боду ҳавои имсола  дар хоҷагиҳои ноҳия мувофиқи санҷиши мутахассисон ҳосили биологии ҳар як гектар замини корами обӣ то 7 сентнер ва дар заминҳои корами лалмӣ то 3 сентнерӣ зиёд гардидааст.
Ба қавли  Абдулло Ҳафизов, раиси деҳоти Корез дар хоҷагиҳои деҳоти Корез имсол дар ҳамкорӣ бо олимони соҳа якчанд навъи ғалла кишт карда шуд ва бо назардошти давраи кишту парвариш ва ҳосилнокии навъҳои ғалла кишоварзон ният доранд барои истеҳсоли тухмиҳои хушсифат дар оянда майдони кишти чунин навъҳоро васеъ намоянд.