Дар Тоҷикобод бахшида ба ҷашни Ваҳдати миллӣ мулоқот доир гардид

Тоҷикобод, 21.06.2016 /АМИТ «Ховар»/. Бахшида ба ҷашни Ваҳдати миллии Ҷумҳурии Тоҷикистон дар ноҳияи Тоҷикобод гурӯҳи корӣ таъсис шуда, дар ҷамоатҳои шаҳраку деҳоти ноҳия бо иштироки намояндагони мақомоти ҳифзи ҳуқуқ ва кормандони Мақомоти иҷроияи ҳокимияти давлатии ноҳия вохӯриҳои судманд баргузор гардида истодаанд.  Дар вохӯриҳо бо сокинон аз ҷониби масъулин иброз гардид, ки сулҳи тоҷикон на танҳо давлату миллатро наҷот дод, балки дар дили насли ҷавони тоҷик умед ба ояндаи нек, хушбахтӣ ва некномиро зинда намуд ва Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар анҷоми ҷанги хунини шаҳрвандии солҳои 1992-1997 дастёбӣ ба сулҳу субот ва ваҳдати миллии комил дар ҷомеаи тоҷик, барқарорсозии тартиботи ҷамъиятӣ ва амният, таъмини бозгашти гурезагон аз хориҷа ба Ватан, қабули Конститутсия ва татбиқи ислоҳоти сиёсию иқтисодӣ саҳми тақдирсоз ва таърихӣ гузоштааст.
Дар арсаи байналмилалӣ таҷрибаи сулҳофаринии Пешвои миллат, муҳтарам Эмомалӣ Раҳмонро падидаи нодири ҳалли низоъҳои сиёсию буҳрони миллӣ эътироф намуда, мавриди омӯзиш ва истифода қарор додаанд.