Дар Қурғонтеппа Рўзи байналмилалии ҳифзи кўдакон таҷлил гардид

Қурғонтеппа, 01.06.2016 /АМИТ «Ховар»/.  Имрӯз, 1  июн дар  маркази маъмурии  вилояти  Хатлон-  шаҳри  Қурғонтеппа  чорабинӣ бахшида  ба  Рӯзи байналмилалии ҳифзи кӯдакон баргузор гардид. Дар он кӯдакон аз  муассисаҳои томактабӣ, мактабҳои санъат ва  ихтироъкорони ҷавон  иштирок карда, дар намоишгоҳ маҳсули дастони худро муаррифӣ намуданд.
Муовини раиси  вилояти Хатлон Махфират Хидирзода  кӯдаконро  бо ин ҷашн табрик  намуда,  ба  ғолибони озмунҳои «Рақси беҳтарин»,  «Сарояндаи беҳтарин»,  «Рассоми  беҳтарин» ва  «Дастони  моҳир»  туҳфаҳо  супорид.
Тавре  иттилоъ  дода  будем, бо  қарори  раиси  вилояти   Хатлон  Давлатшоҳ Гулмаҳмадзода бо мақсади ба  ҳаёти солим ҷалб намудани  кӯдакон  ва  дарёфти истеъдодҳои наврас бахшида  ба  Рӯзи байналхалқии  муҳофизати кӯдакон —   1 июн дар  байни хонандагони муассисаҳои  таҳсилоти умумӣ  ва  тарбиятгирандагони  муассисаҳои  томактабии  вилоят      аз 24 то 31  майи соли 2016 дар доираи  «Як  ҳафтаи  ҳаёти кӯдакон» озмунҳои  «Рақси беҳтарин»,  «Сарояндаи беҳтарин»,  «Рассоми  беҳтарин» ва  «Дастони  моҳир»  гузаронида  шуданд.
Мақсади  озмунҳо бедор намудани  ҳисси ватандӯстию  ифтихори миллӣ, эҳтироми  волоияти қонун,  пешгирӣ намудани амалҳои  номатлуб,  аз қабили ҷиноятсодиркунӣ дар  байни ноболиғон,  дастгирии кӯдакони имконияташон  маҳдуд  ва  ташвиқу  тарғиби тарзи ҳаёти  солим буд.