Генерал Ҷозеф Л. Вотел ба саҳми Тоҷикистон дар мубориза бар зидди терроризму экстремизми байналмилалӣ ва таъмини амнияту суботи минтақавӣ баҳои баланд дод

Душанбе, 15.06.2016. /АМИТ «Ховар»/. «Истиқлолият-ин дастоварди бузург ва бебаҳост. Чун ташрифи ман ба  арафаи таҷлили ин ҷашни бузург рост омад, тамоми мардуми шарифи Тоҷикистонро аз номи Штатҳои Муттаҳидаи Америка, хусусан аз номи Фармондеҳии марказии Қувваҳои Мусаллаҳи Штатҳои Муттаҳида бо ин дастоварди бузург табрик мегӯям ва аз он ҳамкорие, ки мо бо шумо дар тӯли 25 соли охир дорем, ифтихор мекунем»-, иброз намуд фармондеҳи Фармондеҳии марказии Қувваҳои Мусаллаҳи Штатҳои Муттаҳидаи Америка генерал Ҷозеф Л. Вотел баъди мулоқот бо Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки имрӯз дар Қасри миллат баргузор гардид.
Генерал Ҷозеф Л. Вотел дар ҳузури хабарнигорон ҳамчунин изҳор намуд, ки дар суҳбати пурмуҳтаво бо Президенти Ҷумҳурии Тоҷикистон масъалаҳои вобаста ба ҳамкории ду кишвар дар сатҳи минтақавиро мавриди баррасӣ қарор доданд.
Фармондеҳи фармондеҳии марказии Қувваҳои Мусаллаҳи Штатҳои Муттаҳидаи Америка ба саҳми Тоҷикистон дар мубориза аллайҳи терроризму экстремизми байналмилалӣ ва таъмини амнияту суботи минтақавӣ баҳои баланд дода, ваъда дод, ки дар оянда барои густариши муносибатҳо ва таҳкими ҳамкорӣ бо Тоҷикистон кӯшишҳои заруриро ба харҷ медиҳад.
Дар охир генерали амрикоӣ ба Президенти Ҷумҳурии Тоҷикистон муҳтарам Эмомалӣ Раҳмон барои изҳори ҳамдардӣ нисбат ба ҳодисаи мудҳише, ки ба наздикӣ дар  шаҳри Орландои ШМА рух дод, минатдорӣ баён намуда, зикр кард, ки ин бори дигар моро ҳушдор медиҳад, ки мо бояд ҳамкории худро дар мубориза бар зидди терроризм боз ҳам ҷоннок намоем ва дар ин ҷода омодагии ҳамкории ҷониби ШМА-ро бо шарикони тоҷик изҳор намуд.